លោកនាយករដ្ឋមន្ត្រី ហ៊ុន សែន បានផ្ញើលិខិតមួយថ្វាយព្រះមហាក្សត្រ ដើម្បីរាយការណ៍អំពីករណីពាក់ព័ន្ធនឹងវិទ្យាស្ថានពុទ្ធសាសនបណ្ឌិត្យ។
ក្នុងលិខិតដែលចុះហត្ថលេខារបស់ លោក ហ៊ុន សែន កាលពីថ្ងៃទី៦ តុលា ដែលទើបតែផ្សព្វផ្សាយជាសាធារណៈកាលពីសុក្រ ទី១០ តុលា បញ្ជាក់ថា ពុំមានការលក់ ឬដោះដូរវិទ្យាស្ថានពុទ្ធសាសនបណ្ឌិត្យទេ។
ក្នុងលិខិតបន្តថា ចំពោះការរុះរើរបង និងខ្លោងទ្វារវិទ្យាស្ថានពុទ្ធសាសនបណ្ឌិត្យកន្លងមក គឺដើម្បីសម្រួលដល់ការសាងសង់ផ្លូវក្រោមដី ដែលជាគម្រោងណាហ្គាស៊ីធីវ៉ក (NagaCity Walk) នៅពីមុខវិទ្យាស្ថានពុទ្ធសាសនបណ្ឌិត្យ ដែលជាគម្រោងអភិវឌ្ឍន៍មួយដែលក្រសួងធម្មការ និងសាសនា បញ្ជាក់ក្នុងសន្និសីទកាសែតកាលពីថ្ងៃទី២៧ ខែឧសភា ឆ្នាំ២០១៤ រួចហើយថា ការរុះរើរបង និងខ្លោងទ្វារខាងជើងវិទ្យាស្ថានពុទ្ធសាសនបណ្ឌិត្យធ្វើបណ្ដោះអាសន្ន ដើម្បីរក្សានូវសុវត្ថិភាព ចៀសវាងការបាក់ធ្លាក់ដោយយថាហេតុក្នុងអំឡុងដំណើរការសាងសង់ផ្លូវក្រោមដីនោះ។
ក្នុងលិខិតរបស់ លោក ហ៊ុន សែន បញ្ជាក់ថា គ្មានការវិនិយោគ ឬលក់វិទ្យាស្ថានពុទ្ធសាសនបណ្ឌិត្យជាដាច់ខាត។ ប៉ុន្តែកន្លងមក ដោយមានការញុះញង់ពីជនអគតិមួយចំនួន បានបំផ្លើសថា ក្រសួងធម្មការ លក់ ដោះដូរ និងរុះរើវិទ្យាស្ថានពុទ្ធសាសនបណ្ឌិត្យនោះ។
ជុំវិញការរិះគន់របស់ លោក ហ៊ុន សែន នេះ ព្រះតេជព្រះគុណ ប៊ុត ប៊ុនតិញ ប្រធានបណ្ដាញសង្គមព្រះសង្ឃឯករាជ្យ ដើម្បីយុត្តិធម៌ មានថេរដីកាថា កន្លងមកអ្នកតវ៉ាទាមទារឲ្យមានការបំភ្លឺ និងរក្សាការពារវិទ្យាស្ថានពុទ្ធសាសនបណ្ឌិត្យនោះ គឺមានព្រះសង្ឃ និងពុទ្ធសាសនិក ដែលភ័យខ្លាចបាត់បង់ទ្រព្យសម្បត្តិរបស់ព្រះពុទ្ធសាសនា។ ព្រះតេជព្រះគុណ ប៊ុត ប៊ុនតិញ គិតថា ការទូលថ្វាយព្រះមហាក្សត្រនេះ គឺជាចេតនាអាក្រក់មួយ ធ្វើឲ្យព្រះមហាក្សត្រភ័ន្តច្រឡំពីចេតនាពិតដែលព្រះសង្ឃ និងអ្នកគាំទ្រទាំងអស់នោះ។
លោក មិន ឃិន រដ្ឋមន្ត្រីក្រសួងធម្មការ និងសាសនា អះអាងកាលពីថ្ងៃទី៩ ខែតុលា ថា លោកនឹងស្នើឲ្យម្ចាស់ក្រុមហ៊ុនណាហ្គាវើល ផ្អាកសកម្មភាពគ្រប់យ៉ាង និងស្នើឲ្យសាងសង់ឡើងវិញប៉ះប៉ូវការខូចខាត ដូចជារបងជាដើមនៅបរិវេណវិទ្យាស្ថានពុទ្ធសាសនបណ្ឌិត្យ។
មូលហេតុដែលនាំឲ្យក្រសួងធម្មការ និងកិច្ចការសាសនា ចាត់វិធានការដោយបន្ទាន់នេះ នៅបន្ទាប់ពីមានប្រតិកម្មពីប្រជាពលរដ្ឋ រួមទាំងព្រះសង្ឃជាហូរហែកន្លងមក៕
No comments:
Post a Comment